Për nder të 23 prillit - Dita Botërore e Librit dhe të Drejtave të Autorit, sot, në bibliotekën “Hivzi Sulejmani” të Prishtinës, u mbajt aktivitet në shënim të kësaj dite.
Në fjalën e tij hyrëse, drejtori i bibliotekës, z. Munish Hyseni, u shpreh se, ideja për Ditën Botërore të Librit ka lindur në Spanjë, në zonën e Katalonjës. Atij që blinte një libër i dhurohej edhe një trëndafil. Më 15 nëntor të vitit 1995, pasi u morën në konsideratë faktet se, libri ka qenë mjeti më i fuqishëm i shpërndarjes së njohurive dhe se, kjo datë shënon lindjen dhe vdekjen e shkrimtarëve të mëdhenjë të letrave të cilët kanë lënë gjurmë në historinë e letërsisë botërore, në nderim të tyre, Konferenca e Përgjithshme e UNESCO-s zgjodhi pikërisht 23 prillin si, Dita Botërore e Librit, për t’i bërë homazh librit dhe autorëve të tij.
Këtë aktivitet me një fjalë rasti e përshëndeti edhe Agon Ahmeti, drejtor i OJQ “ETEA.
Në vazhdim të aktivitetit u shpallën lexuesit më të dalluar të bibliotekës për moshat e rritura, për vitin 2022/23. Përpos mirënjohjeve, në shenjë nderimi atyre iu dhuruan edhe nga dy ekzemplarë librash.
Lexuesit e dalluar për vitin 2022/23 janë ;
Edona Rexha – studente e fizikës
Ermal Duraku – student i mjekësisë
Hadije Gashi – nxënëse e klasës së dhjetë.
Në fjalën e tyre, Edona, Ermali dhe Hadija, falenderuan institucionin e bibliotekës për mirënjohje dhe përzgjedhjen e tyre si lexuesit më të dalluar dhe në fund u zhvillua një diskutim për mesazhin e qartë që jep libri dhe leximi në përgjithësi.