Shumica e këtyre librave nuk gjenden nëpër librari. Bibliotekat private të viteve ’70-’80 që i kanë shpëtuar luftës, ashtu si edhe disa prej bibliotekave publike mund të ndjehen të privilegjuara që i kanë pronë të çmueshme sidomos botimet luksoze të kolanave të veprave të rilindasve edituar nga shtëpia botuese “Rilindja” e Prishtinës e udhëhequr nga shkrimtari Nazmi Rrahmani.
Mjeku anesteziolog Alban Gjonbalaj, deri dje këto libra i kishte pronë të bibliotekës familjare të blera kryesisht me kredi nga babai i tij, ish i burgosur politik - Shaban Sadri Gjonbalaj. Zbritur nga Vuthajt në Prishtinë për tu dhënë fëmijëve të tij shkollim në gjuhën shqipe, arsimimin e tyre e kishte pasuruar edhe me letërsi. Ajo bibliotekë e familjes sot është zhvendosur në bibliotekën Biblioteka Hivzi Sulejmani Prishtinë në Prishtinë. Veprat e rilexuara nga fëmijët e bacës Shaban, tash e tutje do të lexohen nga komuniteti i madh i lexuesve të Prishtinës, sidomos i brezit të rinj të cilët këto libra nuk mund t’i gjejnë si blerës.
Falemnderit doktor, falemnderit familja Gjonbalaj, e paçit fuqinë me dhanë e me marrë dije e dinjitet - gjithmonë!