Në kuadër të aktivitetit “Prishtina lexon” të cilin e organizoi Komuna e Prishtinës, biblioteka “Hivzi Sulejmani” e Prishtinës, me 31 maj dhe 1 qershor 2015, regjistroi rreth 250 lexues pa pagesë në sheshin “Nënë Tereza”.
Qëllimi i kësaj kampanje ishte që përmes aktiviteteve edukative dhe argëtuese të promovohet libri dhe të nxitet dëshira për lexim tek fëmijët. Interesimi i fëmijëve për librin dhe leximin ishte shumë i madh.
Për dy ditë me radhë, sa zgjati ky aktivitet, tenda ku bëhej regjistrimi i fëmijëve pa pagesë , si dhe i gjithë sheshi “Nënë Tereza”, ishte e stërmbushur me fëmijë. Gjatë këtyre ditëve shpërndau libra për fëmijë të botuara nga biblioteka: “Miku im”, dhe “Bota ime”!
Kjo festë bashkoi arsimtarë, nxënës, aktorë, shkrimtarë, bibliotekarë, prindër, artistë dhe fytyra publike me një qëllim të përbashkët: promovimin e vlerave të librit dhe leximit.